නීති ප්‍රවේශයට අත්වැලක්

Author : ටී.ජයකුමාර්

Publisher : J.K Law Books

Fourth Batch 2019

ISBN : 978-955-98-402-6-6

232 Pages 

නීති සාහිත්‍යයට සරළ භාෂා රටාවකින් නව නිර්මාණ හඳුන්වාදීමට සමත් ටී.ජයකුමාර් මහතා විසින් රචිත ‘නීති ප්‍රවේශයට අත්වැලක්’ නමැති මෙම කෘතිය නීති සාහිත්‍යයයේ නිම් වළලු පුළුල් කරමින් එම ක්ෂේත්‍රයේ පැවැති විශාල අඩුපාඩුවක් මඟහැරවීමට ගත් ප්‍රයත්නයකි.

නීති ප්‍රවේශය අතිශයින්ම තරඟකාරි හා ව්‍යාකූල ස්වභාවයක් උසුලන නිසා නීති විද්‍යාල නීති ප්‍රවේශ විභාගය හා එම ක්ෂේත්‍රය ආශ්‍රිතව සිසුන් ක්‍රමාණුකුලව යොමු කිරීමට මඟපෙන්වන අත්පොතක් වශයෙන් මෙය සම්පාදිතය. කොළඹ මහාධිකරණය ඇතුළු ශ්‍රී ලංකාවේ අධිකරණවල සිංහල -දෙමළ -ඉංග්‍රීසි අධිකරණ භාෂණ පරිවර්තක නිලධාරියෙකු ලෙස රාජ්‍ය සේවයේ කලක් ධූර හෙබවූ මෙම කතුවරයා පසුව ජනමාධ්‍ය ක්ෂේත්‍රයට අවතීර්ණව ප්‍රවෘත්ති සංස්කාරකවරයෙකු, පුවත්පත් කතුවරයෙකු ලෙස ක්‍රියා කර ඇත.

සිංහල,ඉංග්‍රීසි,දෙමළ,ඉතාලි,ප්‍රංශ,ජර්මන් යන භාෂා පිළිබඳ දිවුරුම් දුන් භාෂා පරිවර්තකයෙකු වන ඒ මහතා දැනට  ‘JK භාෂා පරිවර්තන ’ ආයතනයේ සභාපතිවරයා සහ කළමනාකාර අධක්ෂකවරයා ලෙස ක්‍රියාකරමින් ශ්‍රී ලංකාවේ පළමුවන ජාත්‍යන්තර භාෂා පරිවර්තක සමාගම ස්ථාපනය කර එය පවත්වාගෙන යයි.

කොළඹ විශ්වවිද්‍යාලයේ ජනමාධ්‍ය ඩිප්ලෝමාධාරියෙකු වන ජයකුමාර් මහතා, ස්වීඩනයේ කල්මාර් විශ්ව විද්‍යාලයේ ජනමාධ්‍ය හා ප්‍රජාතන්ත්‍රවාදය පිළිබඳ උසස් ඩිප්ලෝමාධාරියෙක් ද වෙයි. පේරාදෙණිය විශ්වවිද්‍යාලයේ භාෂා පරිවර්තන අධ්‍යයනය පිළිබඳ පශ්චාත් උපාධි ඩිප්ලෝමාධාරියෙකු වන ඒ මහතා ශ්‍රී ලංකාවේ මානව හිමිකම් ආයතනයේ මානව හිමිකම් ඩිප්ලෝමාධාරියෙක්ද වෙයි. මෙරට අධිකරණ හා නීති ක්ෂේත්‍රයේ පුවත් හා තොරතුරු රැගත් www.skylankanews.com වෙබ් අඩවියේ ප්‍රධාන සංස්කාරකවරයා ලෙස ද ක්‍රියා කරයි.

ශ්‍රී ලංකාවේ ආණ්ඩුක්‍රම ව්‍යවස්ථා, ජනාධිපතිවරණය 2005 ද 2006 ද ශ්‍රේෂ්ඨාධිකරණ තීන්දුව , මූලික අයිතිවාසිකම් සහ ශ්‍රී ලංකාවේ නීතිය , පළාත් මහාධිකරණ ක්‍රියාදාමය සහ ශ්‍රී ලංකාවේ බුද්ධිමය දේපළ නීතිය  , ශ්‍රී ලංකාවේ අධිකරණ හා නීති පද්ධතිය , ශ්‍රී ලංකාවේ විධායක ජනාධිපති ක්‍රමය සහ ජනාධිපතිවරණ පුරාණය යන ග්‍රන්ථ නීති සාහිත්‍යයට හඳුන්වා දුන් ජයකුමාර් මහතාගේ ‘නීති ප්‍රවේශයට අත්වැලක්’ නමැති මෙම කෘතිය සාර්ථක නීති අධ්‍යයන ග්‍රන්ථයක් වේ. උසස් අධ්‍යාපනයෙන් පසු නීති විද්‍යාල නීතිවේදය පිළිබඳ විවිධ අධ්‍යයන හා ඒ හා සබැඳි වෙනත් සියලු විෂය ක්ෂේත්‍ර ව්‍යුහය පිළිබඳ විශ්ලේෂණාත්මක පර්යේෂණ කෘතියක් වන මෙහි ඊට අදාළව සිසුන් යොමුවිය හැකි මාර්ග පිළිබඳ පුළුල් මඟපෙන්වීමක් හා නීති ක්ෂේත්‍රයේ තොරතුරු රැසක් අන්තර්ගතය.

#NeethiPraweshayataAthwelak #TJayakumar #Neethiya # SinhalaBooks